Galatians 4
1La ti lox epasum levelinga rak, keretna; no lamdak naba ruuna xaka lempanga apnovos at ne temen, neni i lok ngan laradi saksaxaruki at levenmaares neni i aau la i mumu asu levelinga at ne temen, ketla melemu neni naba silok la naba ruuna ka levempanga axap at ne temen. 2La neni nabak lok levempanga, luvuttadi loklok tatao ren na tong i rin kusu neni nak lox i, naba se rinotno at loxonaleng ne temen ga vit li i, xusu na lox asilox i. 3I lok ngan pam gano nedik ta goxo xasep nunuan at luruturun la dik taga nemen maxopok at Lenavolo eburu mi leventaangas teren nade xopok at na lavatbung menemen. 4Ketla loxonaleng ga vot ne Moroa ga vit li i, neni ga riki ne Nitna rinotno. La neni ga ravasu ngan lamdak at latkin at na lavatkangka, la neni gak lok maxopok at Lenavolo at leme Judaia, 5kusu ri un ka amlong nedi digak lok maxopok at Lenavolo, la kusu nedik ataba ravasu ngan luvutnitna ne Moroa. 6Nedik luvutnitna ne Moroa, kuren la neni ga riki asu Loroonan i nemen keneng at ne Nitna ukeneng ti lorooro atnedik, la neni mo Loroonan ik lok nedik la diram doma su at ne Temen nedik la dira toro rin keretna, “Tamak, Tamak!” 7Kuren la nemi mixo lok ngan bok ba lavaanat saxaruki, ketla nemi luvutnitna. Kuren la ne Moroa naba raba nemi mi leveloklox anarong neni ga gagas li i xusu ri luvutnitna.Lodoxoma Rinotno At Ne Pol Mumu Lenavolo
8Gano, nemi mi goxoklen ne Moroa, kuren la miga lok ngan lavaanat saxaruki at laxampoovo moroa. 9Ketla amo manga miraklen ne Moroa, i ruturun aleng do ne Moroa iklen nemi; ira lok bok ba mo xereva la miramlong mu manga mo leveloklok la leventaangas gamasa at Lenavolo la mira lok li nimi maxopok teren? Tila la mira vara manga i xusu mina lok ngan lavaanat saxaruki at na laxaloklok? 10La mi mumu asu manga mo leveloklok ti lok katling levenaleng la leven gaaling la levenaleng at laavat la lamaares. 11Nenia am doma solo mumu nemi. Kereva, leven gugu rak aga lox i xantubu atnemi, neni naba ngan lugugu asen kepe mun?12Luvutnetak mi luvurinuk, a sing tinotno nemi xusu mina ke xepe mo leveloklok la leventaangas at Lenavolo kerekngan nenia aga ke xepe i; la kerepmo nia axok lok maxopok teren kerekngan nemi bok mi goxok lok maxopok teren. Ap mo levenaleng nenia aga nemen eburu minimi, nemi mi goxo lok tepanga xapmek tia. 13Miklen bok ua lavasuun teren la nenia aga vavang avot mi Lagale Lavavang tinemi; lavasuun teren atla nenia aga lok mekmeres. 14Keke i do mo lanmeres tarak megano ga lox angtang nemi, ketla nemi mi goxo sok tixirixes ia la mi goxo raba arulu ia. Ketla miga seega rangarang kaka ia ngan nemi giba lox i ri laangelo boro vana at laxalibet kopla ne Iesu Karisito axa. 15Lomomo ga umsu atnemi, ketla ana nga, ira on ta ua? Do nemi gita epovo xuren, la nemi ro migita lik gogo su vam mi levengkatli atnemi la mi gita raba ia min. 16Kereva, nemi mi munepen minia, atla aga paase nemi mi luruturun?
17Limixin petpes mo di tong asu lavavang petpes di doma solo nimi la di lok tong i xusu dina sat kaka nimi, ketla na loklok atdi i lok kapmek tinotno, atla di vara mun i xusu dinak lox epeseves nemi basinge ia, kusu nemi minaba etangas eburu minedi. 18I lox avukat do limixin dina doma solo mumu tentaba vetpes, mo do loklok nedi dik lox i, i lox avukat. La i lox avukat do mina doma mumu solo amisik tentaba vetpes la kopmen do ap mo mun levenaleng nenia ak lox eburu minemi. 19Luvutnuruk orong! Nenia a suma losongsongot mumu nemi ngan latkin ing songot at laaleng pipisik teren, la anaba suma na losongsongot se at laaleng lorooro at ne Karisito naba suxuna axap nemi. 20Aram doma mata i do nenia a girak lox eburu minemi, kusu agiba xasep at loklok atnimi la agiba lok kun lavapaase rak la agira paase atnaasan tinimi. A lok bukbulu mu aleng nemi.
Lampoovo At Ne Agar Mi Ne Sera
21A vara i xusu ana sue be nemi lentaba do ua lavasuun teren la mi vara i do minak lok maxopok at Lenavolo? Kereva, ming tonga xaka bok lempanga Lenavolo i paase i? 22I paase xeretna do, ne Abaram, ga ruuna legepu madak, ga lara lamdak at latkin asaxaruki ren, la lara at latkin tinotno ren. 23La lamdak neni ga ruuna xaka i at latkin asaxaruki ren, ga ravasu at loklox araut madak, ketla lamdak ua neni ga ruuna xaka i at latkin tinotno ren, diga visix i mumu laxakaape at ne Moroa.24Mo lempanga ga vot kantubu ap mo legeputkin, neni lampoovo at legepu ekabus. I ngan lara at ne Agar, i ru katling limixin ua diga visik abeles di at loxokoxo, eburu mi lekabus mumu Lenavolo ua diga lok ka i ro at lakaana Sinai. 25La ne Agar, neni i ru katling bok lakaana Sinai, keneng at lenep taba Arabia; neni lampoovo ri lemenemen silok Jerusalem ik lok keneng at loxokoxo eburu mi limixin axap me Judaia. 26Ketla ne Jerusalem ua ik lok to vana at laxalibet, neni xopmen nak lok at loxokoxo, la neni, nenen dik; 27i ngan Lovoang Kaala i vaase xeretna,
“Nenu latkin uxo ruuna laxamdak, una momo. La nenu latkin ua u xovisi una suma losongsongot ngan lavakin dim suma i at loxonaleng di pisik laxamdak, unap kup la una momo mi lososoro. La latkin latlok teren ga on basinge i, neni naba ruuna taxannitna solo polo mo lara ua latlok teren kopmen na vonon basinge i.” a
28Luvutnetak mi luvurinuk, nemi luvutnitna ne Moroa, mumu lusuusu at laxakaape ren, ngan laxakaape ren ti ne Abaram mi lamdak ne Aisak. 29Ap mo levenaleng mo lamdak ua diga visix i at langas tik lox araut madak, neni ga lox asongot mo lamdak diga visix i mumu Loroonan at ne Moroa; la at na levenaleng, ik lok bok kuren. 30Ketla Lovoang Kaala i vaase lavanga salai? I vaase xeretna,
“Una riki aonon latkin asaxaruki eburu mi ne nitna, mila nitna noxo ruuna xaka toxot at levempanga at ne temen, kerekngan lamdak at latkin tinotno ram.” b
31Kuren la luvutnetak mi luvurinuk, nedik kopmen luvutnitna mo latkin asaxaruki, ketla nedik luvutnitna at latkin sepsepmus at ne Abaram.
Copyright information for
MMX